Terminals Holding Sole Proprietorship delegatsiyasi yuk terminali infratuzilmasi va ishlash jarayoni bilan yaqindan tanishish maqsadida Navoiy xalqaro aeroportiga tashrif buyurdi. Bu haqda Uzbekistan Airports matbuot xizmati xabar bermoqda.
Noyabr oyi oxirida Uzbekistan Airports va Terminals Holding oʻrtasida Navoiy xalqaro aeroporti yuk terminalini boshqaruvga berish boʻyicha kelishuv imzolangan edi.
Maqsad — Terminals Holding tomonidan taklif etilayotgan zamonaviy texnologiyalar va investitsiyalardan foydalangan holda Navoiy aeroporti yuk xabini rivojlantirish uchun qoʻshma resurslarni birlashtirish.
Reklamani yopish
Erishilgan kelishuvlardan oldin, BAA kompaniyasi loyihaga qiziqish bildirgan paytdan boshlab, ikki yil davomida muzokaralar olib borildi.
Taʼkidlanishicha, shu kunlarda Terminals Holding vakillari Navoiy aeroportining yuk terminaliga tashrif buyurib, infratuzilma, omborlardagi mavjud maxsus texnika va jihozlar bilan tanishgan.
Shuningdek, import qilinadigan tovarlarni qayta ishlash jarayonlari va bojxona organlari bilan oʻzaro hamkorlikni hamda Oʻzbekiston yuk tashish sohasi bilan bogʻliq qonunchilik normalarini oʻrganishga kirishilgan.
Tahlil natijalariga koʻra kompaniya mutaxassislari yuk xabini rivojlantirish strategiyasini va yuk reyslarining istiqbolli yoʻnalishlari prognozini tuzadi.
Navoiy xalqaro aeroportining yuk terminali Uzbekistan Airways aviakompaniyasi va Korean Air oʻrtasidagi kelishuv doirasida 2008 yilda qurilgan va shartnoma 2019 yilgacha amal qilgan.
2022 yilda Uzbekistan Airports tomonidan yuk terminali rekonstruksiya qilinib maxsus jihozlar xarid qilingan.
Ayni paytda Navoiy aeroportida har oyda 40 ga yaqin yuk reyslari, jumladan, texnik xizmati uchun toʻxtashlar, transfer, import va eksport yuklarini amalga oshiruvchi reyslar qabul qilinadi.
Navoiy aeroportiga MNG Kargo, Turkish Airlines, Silk Way kabi kompaniyalar ham yuk reyslarini amalga oshiradi. 2022 yil yakuniga koʻra, Navoiy aeroporti orqali 18,6 ming tonna yuk tashilgan.
