Хатирчи туманида яшовчи 43 ёшли фуқаронинг туғилганлик ҳақидаги факти суд қарори билан тасдиқланди. У уй шароитида туғилгани учун «метрика» ва фуқаролик паспорти ололмаган.
Туманнинг Майдонсой маҳалласида яшовчи, 1978 йил 28 март куни туғилган Собир Қаршиев туман адлия бўлимига мурожаат қилиб, фуқаролик паспорти ололмай сарсон бўлиб юрганини билдирган. Маълум бўлишича, у уй шароитида туғма кўзи ожиз ҳолатда туғилгани сабабли тиббиёт муассасаси томонидан туғилганлик ҳақида маълумотнома тузилмаган.
ФҲДЁ бўлими томонидан 1975–1981 йиллардаги архив маълумотлари ўрганилганида Собир Қаршиевга туғилганлик тўғрисида далолатнома расмийлаштирилмагани, фуқаро таълимга жалб қилинмасдан қолиб кетгани аниқланган.
Фуқаролик ишлари бўйича Хатирчи туман суди раиси Баҳодир Бабақуловнинг Кун.узъга хабар беришича, суд иш ҳужжатларини тўлиқ муҳокама қилиб, Собир Қаршиевнинг 1978 йил 28 март кунида туғилганлик фактини белгилаб беришни лозим топган. Суднинг ҳал қилув қарори 25 февраль куни кучга киради ва шундан кейин фуқарога туғилганлик ҳақида гувоҳнома ва фуқаролик паспорти берилади.
Навоийда 43 ёшли фуқаро «метрика» оладиган бўлди
