Навоий шаҳри ва Қизилтепа тумани ҳокимларига ёшлар сиёсати, ижтимоий ривожлантириш ва маънавий-маърифий ишлар бўйича ўринбосар тайинланди. Навоий шаҳри ҳокимининг биринчи ўринбосари ва Томди тумани ҳокимининг икки нафар ўринбосарига ҳайфсан берилди.
Навоий шаҳар ҳокимининг қарори билан Илҳом Раҳматов ёшлар сиёсати, ижтимоий ривожлантириш ва маънавий-маърифий ишлар бўйича ҳоким ўринбосари лавозимига тайинланди. У тайинловга қадар вилоят ҳокимлиги котибият мудири лавозимида фаолият юритиб келаётганди.Қизилтепа тумани ҳокимига ҳам ёшлар сиёсати, ижтимоий ривожлантириш ва маънавий-маърифий ишлар бўйича ўринбосар тайинланди. Ҳокимнинг тегишли қарорига кўра, мазкур лавозимда Ўлмасжон Истамов иш бошлаган. У шу кунгача Қизилтепа тумани ХТБ мудири лавозимида ишлаган.Шунингдек, Навоий шаҳар ҳокимининг биринчи ўринбосари Диёржон Элмуратовга аҳоли хонадонларида сўровнома асосида олиб борилаётган хатлов ишларини ташкиллаштиришда масъулиятсизлик қилгани учун ҳамда Томди тумани ҳокимининг биринчи ўринбосари Серик Саденовга ҳоким ёрдамчилари фаолиятини самарали ташкил қилмагани сабабли ҳайфсан интизомий жазоси қўлланган. Томди тумани ҳокимининг ўринбосари – инвестициялар ва ташқи савдо бўлими бошлиғи вазифасини вақтинча бажарувчи Азиз Намозов ҳам ҳудудий лойиҳалар, иш ўринлари ҳамда экспорт прогнози кўрсаткичлари бажарилмагани туфайли интизомий жазога тортилган.
