Oʻzbekiston Osiyo taraqqiyot banki bilan birgalikda “Zamonaviy iqtisodiyot uchun koʻnikmalarni rivojlantirish” loyihasini amalga oshirishga kirishmoqda. Bu haqda Bandlik va mehnat munosabatlari vazirligiga tayanib, Spot xabar qildi.
Qayd etilishicha, Vazirlar Mahkamasining 2 fevraldagi qarori bilan loyihani amalga oshirish rejasi tasdiqlangan. Uni amalga oshirish bilan Oʻzbekiston tomonidan Mehnat vazirligi va Oliy taʼlim vazirligi shugʻullanadi.
REKLAMA
Reklamani yopish
Loyiha byudjeti 162 million dollarni tashkil etadi, shundan 93 million dollari OTB mablagʻlari hisobidan ajratiladi.
Ushbu tashabbus mehnat bozori va kasb-hunar taʼlimi tizimi oʻrtasidagi aloqani mustahkamlaydi. Bundan tashqari, bu ishsizlar va yoshlarni kasb-hunarga oʻqitish sifatini oshirishga, bandlik va ish beruvchilar qoniqishini oshirishga xizmat qiladi.
Mutaxassislarning fikricha, Oʻzbekiston iqtisodiyoti barqaror oʻsib borayotganiga qaramay, malakali kadrlar yetishmasligi uning rivojlanishi va xorijiy sarmoyalarni jalb etishiga toʻsqinlik qilmoqda (buni Jahon banki ham taʼkidlagan).
OTB maʼlumotlariga koʻra, firmalarning 35 foizi oʻsish uchun toʻsiq sifatida malaka yetishmasligini koʻrsatadi. Sanoat korxonalarining 49 foizi malakali ishchilarni topishda muammolarga duch kelmoqda.
Hukumat kasb-hunar taʼlimi va kadrlar tayyorlashni takomillashtirish boʻyicha qator chora-tadbirlarni amalga oshirgan. Ushbu loyiha ularni amalga oshirishni qoʻllab-quvvatlash maqsadida ishlab chiqilgan, deya taʼkidlaydi vazirlik.
Loyiha Mehnat vazirligi tizimidagi 14 ta kasb-hunarga oʻqitish markazi hamda 6 ta kollej va texnikumning infratuzilmasini yaxshilashga xizmat qiladi. Ularga zamonaviy oʻquv va oʻquv-ishlab chiqarish uskunalari, taʼmirlash ustaxonalari xarid qilinadi.
Bundan tashqari, kasb-hunar taʼlimi tashkilotlari uchun oʻquv dasturlari, talablar va standartlar ishlab chiqiladi. Kasbiy malaka oshirish boʻyicha milliy va tarmoq kengashlari tashkil etiladi.
Shuningdek, 2021 yil oktyabr oyida tashkil etilgan Mehnat bozorini oʻrganish institutining salohiyatini kuchaytirish rejalashtirilgan. Ushbu qadam mehnat bozori toʻgʻrisidagi maʼlumotlarni toʻplash va tahlil qilishni, shuningdek, ishchi kuchiga boʻlgan talabni prognoz qilishni yaxshilashga yordam beradi.
Loyiha aholining ijtimoiy himoyaga muhtoj qatlamlarini, xususan, ayollar va imkoniyati cheklangan shaxslarni kasbga oʻqitishni qoʻllab-quvvatlaydi. Bundan tashqari, oʻqituvchilar, instruktorlar va ishlab chiqarish taʼlimi ustalari oʻz malakalarini oshiradilar.
Loyiha kamida quyidagilarga yordam berishi kutilmoqda:
10 ming nafar texnikum va kasb-hunar talabasi;48 ming ish izlovchi, shu jumladan, 500 nafar nogironligi bor shaxs;kollejlar va texnikumlardagi 600 nafar ixtisoslashtirilgan oʻqituvchi;ushbu muassasalarning 100 nafar rahbar va xodimi;davlat bandlik xizmati tizimidagi 1200 nafar xodim va 210 nafar rahbar
OTB Oʻzbekistonda kasb-hunar taʼlimini yaxshilash uchun 93 mln dollar ajratadi
