Toshkent shahar hokimi J.Ortiqxoʻjayev, hokim oʻrinbosarlari va qator boshqarmalar boshliqlari ishtirokida yigʻilish boʻlib oʻtdi. Unda, poytaxt hokimi mamlakatimiz hududi, xususan, Toshkent shahriga keskin sovuq ob-havoning kirib kelishi munosabati bilan har qanday talofatlarning oldini olish boʻyicha mutassaddilarga tegishli topshiriqlarni berdi:
— anomal sovuq kunlar davrida, oʻn kun davomida: 9 dan 18 yanvargacha shahar va tuman hokimliklarida, boshqarmalar va ularning tuman boʻlimlarida har qanday majlislar (jumladan Zoom shaklida), tadbirlar, masʼullarni asosiy faoliyatidan chalgʻituvchi boshqa yigʻilishlarni oʻtkazish taqiqlanadi;
— vaziyatlarni boshqarish yuzasidan topshiriqlar telefon va onlayn aloqa tizimlari orqali toʻgʻridan-toʻgʻri beriladi;
— qolipli non ishlab chiqaruvchilarga gaz va elektr energiyasi uzluksiz yetkazib berilishini nazoratga olish;
— shahar jamoat transportining tizimli ishlashi choralarini koʻrish;
— markaziy va ichki yoʻllarni tezkorlik bilan qor va muzlamalardan tozalashni tashkil qilish;
— boshqaruv servis kompaniyalari tomonidan koʻp qavatli uylar yoʻlaklarini qor va muzlamalardan oʻz vaqtida tozalashni taʼminlash;
— elektr tizimida avariyalarni tezkor bartaraf etish;
— tugʻruqxonalar, shifoxonalar, muruvvat va mehribonlik uylarining issiqlik taʼminotini alohida nazoratga olish, ulardagi mavjud elektr generatorlarini yoqilgʻi bilan taʼminlash, toʻxtovsiz ishlashi uchun shay holatga keltirish;
— favqulodda vaziyatlar boshqarmasi tomonidan 2 kun muddatda jamoat joylarida yongʻin xavfsizligini taʼminlash boʻyicha qayta koʻrik-nazorat tadbirlarini oʻtkazilishini taʼminlash;
— aholini jamoat transportidan foydalanishiga keng imkoniyatlar yaratish va imkon qadar shaxsiy transport vositasidan foydalanmaslikni tavsiya etish;
— navbatchilik, shtablar va call-markazlar faoliyatidagi aloqa telefonlarining uzluksiz ishlashini nazoratga olish;
— 2 kun muddatda 103 tez tibbiy yordam mashinalarini tibbiy anjom va dori vositalari bilan taʼminlanganlik darajasini koʻzdan kechirib, yetishmovchiliklarni toʻldirish;
— koʻchada xizmat qilayotgan yoʻl harakati xavfsizligi xizmati va obodonlashtirish xodimlarini issiq choy va yegulik, ixcham termos idishlari bilan taʼminlash va hokazo.
